Roteiro polos arredores de Corcubiom
O município de Corcubiom abarca umha pequena península no centro da sua ria, no segmento final do caminho de Fisterra. Ao abrigo do seu estratégico porto, a vila foi crescendo ao longo da costa até formar um passeio de brancas galerias de sabor marinheiro, com amostras de viver fidalgo. Nom faltam as casas brasonadas espalhadas polas praças e ruelas interiores, nem os contributos dos chamados indianos. Além disso, por ser cabeceira de partido judicial, aqui situam-se os julgados e também as delegaçons das diversas administraçons e organismos p̉blicos.
Corcubiom é um concelho que está composto por duas freguesias: Sam Marcos e Redonda.
Neste roteiro vamos percorrer a zona nom urbana de Corcubiom. É um percurso de 9 kms aproximadamente, polo que pode fazer-se andando (pode levar de 2 a 3 horas), de bicicleta ou de automóvel. As distáncias quilométricas que se indicam partem da Praça de Castelao, começo do nosso percurso.
Partimos da praça de Castelao de Corcubiom. Seguimos o passeio marítimo em direcçom ao porto.
Desde ali podemos avançar polo passeio de Plácido Castro Rivas até a praia de Quenxe. Também se pode ir pola estrada AC-442 até o cemitério do povo.
Desde Quenxe deve-se tomar umha estrada que vai por cima das urbanizaçons. Desde a estrada AC-442 pode virar-se à esquerda à altura do cemitério (0.8 Km).
Ao pouco de tomar esta estrada topamos com um par de Moinhos de regato (1.1 Km).
Essa estrada vai subindo, oferecendo-nos umha vista da ria de Corcubiom e Cee.
Aos 2.1 kms topamos o Castelo do Cardeal.
Seguimos pola mesma estrada e chegamos até umha curva muito grande à direita (3.2 Km),de onde parte à esquerda umha pequena estrada que vai chegar ao campo de futebol municipal de Corcubiom e ao farol do Cabo Cee (3.7 Km).
Desde este cabo pode ver-se umha das mais formosas vistas da ria de Corcubiom. Defronte vê-se o monte Pindo e no mar podemos ver as ilhas Lobeiras que guardam a entrada da ria. Olhando para a direita podemos ver a península de Fisterra em cujo extremo ocidental se situa o seu mítico farol.
Voltamos para trás e continuamos pola estrada que abandonamos. Continuando chegamos ao lugar de Redonda (5.8 kms). No final da estrada que discorre polo centro do lugar está a Igreja de Sam Pedro de Redonda (século XII) (6.2 Km). Paga a pena achegar-se até ali para ver este templo e o seu adro presidido por um tradicional cruzeiro.
Redonda é a outra freguesia de Corcubiom, ademais da de Sam Marcos e, ao contrário desta, é plenamente rural. Nela podemos admirar um grande número de cabaceiras e amostras de arquitectura popular. Ademais, há umhas vistas formosíssimas da costa de Corcubiom e Fisterra.
Depois de dar umha volta por Redonda podemos seguir a estrada no mesmo sentido que levávamos antes de nos desviar em Redonda e acabamos chegando ao albergue de Corcubiom (7.9 Km). Este albergue é um dos que acolhem aos peregrinos que fam o caminho jacobeu até Fisterra.
Próximo ao albergue discorre a AC-442 que chega até Fisterra. Para voltar a Corcubiom recomendamos cruzar essa estrada e seguir polo caminho situado em frente do que chegamos. Esta é parte da prolongaçom do caminho de Santiago até Fisterra mas imos percorrê-lo em sentido contrário.
Ao pouco chegamos ao lugarzinho do Vilar (8.4 Km), onde também há grande quantidade de cabaceiras e várias amostras interessantes de arquitectura popular.
Desde ali até Sam Marcos há algo menos de 1 km, que se percorre em permanente baixada. Se imos andando ou de bicicleta podemos utilizar o caminho de Santiago, mas se imos de carro cumpre tomar a estrada que baixa directamente ao centro da vila. Desde o cruzamento do centro do lugar, à esquerda vai o caminho de Santiago (andando e de bicicleta) e de carro cumpre seguir recto. Se tem algumha dúvida, os vizinhos de Vilar informarám-no com gosto.
Se seguimos esse passeio, temos uns minutos muito agradáveis, pois que avançamos à beira do monte de Corcubiom e há vistas muito formosas do povo e a sua ria. Finalmente, chegaremos ao núcleo de Corcubiom polo Campo de Santo António.