Roteiro das antas ou das mámoas
A Costa da Morte é umha zona especialmente rica em megalitismo.
Os Megálitos som monumentos funerários datados entre os anos 4000 a 2000 a.C. A variedade de monumentos megalíticos é muito grande, mas costumam ser estruturas bastante complexas. Para conhecer mais sobre o megalitismo na Galiza e os tipos de monumentos recomendamos a site sobre o megalitismo na Galiza de Júlio Anta..
Na zona, há grande quantidade de antas ou dólmenes e petróglifos. Nom é fácil encontrar alguns destes monumentos, ao nom estarem devidamente indicados, mas recomendamos a sua procura, tarefa em ocasions difícil mas muito reconfortante.
O dólmen mais conhecido da zona a Anta de Dombate.
Aqui descreveremos a rota melhor indicada e documentada da zona, a rota das mámoas de Vimianço, que percorre vários monumentos deste Concelho e do vizinho Sás.
A rota parte da estrada Baio-Bainhas que se pode tomar a 2 kms de Baio, na estrada C-552 Corunha-Fisterra no tramo que vai de Vimianço a Baio
Monte Toram
Como chegar: Pola estrada Corunha-Fisterra, a 2 kms de Baio toma-se um desvio em direcçom a Bamiro. Ali toma-se outro desvio à direita que leva à igreja paroquial e logo até o Cume.
Ao lado do Monte Toram encontra-se umha pedra muito grande de várias toneladas de peso. Umha lenda conta que umha moura (ser mitológico galego) levou-a até ali sobre a sua cabeça, enquanto fiava numha roca. Posteriormente cristianizaria-se a lenda trocando a moura por umha virgem.
Pedra Coberta
Cronologia: 4000 - 3000 a.C.
Localizaçom: Parroquia de Treos (Vimianzo).
Como chegar: Na estrada Baio-Bainhas, a 1 km do núcleo de Tines tomamos um desvio à esquerda em direcçom à aldeia de Pedra Coberta. A anta está à direita, à beira da estrada.
Georg e Vera Leisner estudárom este monumento nos anos 30 do século XX e dérom-lhe muito renome internacional. O mais relevante som as pinturas de cor preta e vermelha sobre fundo preto, que se encontram entre as mais importantes da arte Megalítica Europeia.
Pedra Moura
Cronologia: 4000 - 3000 a.C.
Localizaçom: Parroquia de Serramo (Vimianzo).
Como chegar: Desde a anta de Pedra Coberta, seguimos pola mesma estrada 1 km. Ali deve tomar-se um desvio à esquerda, situado pouco antes de chegarmos a Arjomil. Seguimos até passarmos à beira da igreja de Treos e voltamos à estrada Baio-Bainhas. Continuamos em direcçom a Bainhas até chegarmos à aldeia de Cárnio. à altura das casas, numha mudança de rasante, cumpre tomar um caminho pavimentado com brita que passa à beira de várias leiras. Seguimos uns 900 metros e tomamos umha pista à direita. O dólmen encontra-se um pouco mais adiante.
Esta anta situa-se no centro dumha mámoa de arredor de 15 metros de diámetro. Tem restos de pintura no início do corredor.
Pedra da Lebre
Cronologia: 4000 - 3000 a.C.
Localizaçom: Parroquia de Serramo (Vimianzo).
Como chegar: Desde Pedra Moura voltamos à estrada em direcçom Bainhas e encontramos este dólmen pouco antes de chegar a Serramo, a uns 50 metros à direita da estrada, num eucaliptal.
Este é um monumento de grandes proporçons. Pertence ao grupo dos monumentos de cámara poligonal e de corredor curto.
Arca da Piosa
Cronologia: 4000 - 3000 a.C.
Localizaçom: Parroquia de Muinho (Zas).
Como chegar: Ao aceder a Serramo cumpre tomar umha estrada à esquerda em direcçom Comareiro. Seguimos até que se acaba a estrada asfaltada e ali é preciso tomar umha pista à esquerda pola que cumpre continuarmos quase 2 kms até chegarmos à cancela dumha explotaçom florestal. Dentro da explotaçom cumpre tomar a primeira pista à direita e encontramos o dólmen a uns 700 metros.
É um dos maiores monumentos megalíticos da Galiza. Os esteios chegam a pesar 35 toneladas.
Pedra da Arca
Cronologia: 4000 - 3000 a.C.
Localizaçom: Parroquia de Baínhas (Vimianço).
Como chegar: Desde Bainhas cumpre continuar recto em direcçom a Ponte Olveira. A 2 kms toma-se umha estrada à esquerda que vai até a anta.
É umha das antas mais grandes da Galiza. A tapa pode chegar a pesar 12 toneladas. Na cámara aparecem restos de gravados em forma de U ou V, com restos de pintura vermelha.
Há outra mámoa na zona cun nome similar, como podedes ver na la ficha de patrimonio da mámoa de Pedra da Arca.
Casota de Freáns
Cronologia: 2500 - 2000 a.C.
Localizaçom: Parroquia de Verdoias (Vimianço).
Como chegar: Desde Verdoias cumpre tomar um caminho à esquerda e encontramos o dólmen aos 900 metros aproximadamente.
Pola sua forma classifica-se no grupo de arcas megalíticas, antecessoras das cistas da Idade do Bronze. Nos esteios apreciam-se gravados de covinhas e de cruzes.