Quando vir
Corcubiom, e mais extensamente a Costa da Morte, é umha terra que se pode visitar todo o ano, apresentando diferentes caras e atractivos ao visitante segundo a época:
Primavera (do 21 de Março ao 20 de Maio)
Umha das épocas mais formosas para visitar a Costa da Morte. O espertar à vida da natureza fai-se mais evidente numha zona quase virgem como a nossa.
As temperaturas sobem em relaçom ao inverno, com temperaturas médias algo maiores de 10 graus, mas a chúvia segue sendo um elemento muito habitual.
Os visitantes encontrarám a comarca sem tantos visitantes como no verao, polo que é umha época formidável para desfrutar da nossa natureza. Isso sim, recomendamos traer roupa de chúvia para as actividades ao ar livre.
Em Corcubiom, a festa mais importante desta estaçom é a de Sam Marcos, o patrom de Corcubiom, que se celebra o 25 de Abril.
Também é importante na zona a celebraçom da Semana Santa, tendo especial releváncia a Semana Santa de Fisterra.
Verao (do 21 de Maio ao 20 de Setembro)
Nesta época, nomeadamente nos meses de Julho e Agosto, chega a maior parte de visitantes à nossa terra.
O clima continua morno, com temperaturas médias arredor dos 20 graus. Tampouco é descartável que chova, ainda que é muito menos provável que no resto do ano.
Nesta época podem-se combinar as visitas culturais com o desfrute da natureza, e mais concretamente com todo o relacionado com o mar e as praias. É o melhor momento para desfrutar dos desportos naúticos em Corcubiom.
A festa com mais renome ultimamente em Corcubiom e a que mais visitantes achega à nossa vila é a Feira Medieval, que se celebra a terceira semana de Julho. Durante um fim-de-semana, a vila converte-se num Mercado Medieval e o povo participa vestido com roupas de época e desfrutando de todos os postos de venda que enchem as ruas do conjunto histórico da vila.
Ademais da feira medieval, no verao é quando se celebram a maior parte das festas e celebraçons de Corcubiom, bem como em toda a comarca.
Outono (do 21 de Setembro ao 20 de Dezembro)
Para muitos, a melhor época para visitar a zona. A maioria dos turistas vam-se. A gama de castanheiros, aos poucos, vai alternando com o verde e fazendo que a saudade se instale na paisagem.
O clima é semelhante ao de Primavera, com temperaturas médias superiores aos 10 graus e precipitaçons menos copiosas que no inverno, mas habituais.
O principio do Outono também é um bom momento para desfrutar da nossa natureza.
Em Corcubiom, esta época começa com a tradicional festa da Virgem das Mercedes (24 de Setembro), que tradicionalmente serve para despedir-se dos visitantes e do verao.
Inverno (do 21 de Dezembro ao 20 de Março)
O clima nestas terras é bastante moderado, polo que no inverno raramente se baixa dos 10 graus. Também cumpre ter em conta a chúvia, que costuma ser abundante e que propicia o verdor destas terras.
No inverno a festa que mais se celebra na nossa terra (ademais do Natal) é o Entruido, que se celebra em toda a Galiza de maneira especial. Na nossa zona tem especial renome o Entrudo de Fisterra.
Também é tradicional desta época a gastronomia relacionada com o Entruido, como o cozido, as filhós ou as orelhas.
Para conhecer o tempo concreto na nossa comarca nos dias vindouros, recomendamos a prediçom de meteogalicia para Fisterra.